Հոդվածի առաջին մասը կարող եք կարդալ այստեղ:

Այնուամենայնիվ գովազդում միայն էմոցիաները քիչ են, եթե գովազդվող ապրանքը ավելի լուրջ բնույթի է` նախատեսված հասուն մարդկանց համար: Անհրաժեշտ են ասվածի ապացույցներ լաբորատորիաներում անցկացված հետազոտությունների տեսքով կամ օգտագործման արդյունքը ցուցադրելով, ինչպես անում են լվացքի փոշիների, կենցաղային այլ պարագաների դեպքում: Համոզիչ պետք է լինեն նաև տների, մեքենաների և ընդհանրապես անշարժ, թանկարժեք գույքի գովազդները: Սակայն այս ամենը բավական չէ, հատկապես եթե թիրախ խումբը միջին կամ ցածր աշխատավարձ է ստանում: Այս դեպքում պարբերաբար օգտագործվում են §մատչելի գներ», «դուք սա կարող եք ձեզ թույլ տալ», §աննախադեպ ցածր գներ», §հատուկ ուսանողների համար» ևն արտահայտություններ: Սա մեծապես բխում է այն հանգամանքից, որ մարդկանց ցանկությունները, ի տարբերություն հնարավորությունների, անսահմանափակ են: Մեզնից յուրաքանչյուրը, օրինակ, նոր, ընտիր մեքենա է ցանկանում, բայց դա դեռ բավարար չէ, որ ցանկությունը իրենից պահանջարկ ներկայացնի. գովազդը պետք է կարողանա համոզել, որ մենք կարող ենք մեզ թույլ տալ գնել այդ մեքենան: Դա կարող է լինել ինչպես ապառիկ վաճառքի §վարդագույն» հեռանկարի, այնպես էլ ամանորյա զեղչերի, նվերների տեսքով ևն:
Հետաքրքիր օրինակ են նաև սերիական գովազդները. երբ առաջին հաջողված գովազդային հոլովակին հետևում են նույն սկզբունքով նկարահանված շարունակություններ: Այսպես է, օրինակ, դեռևս 1980-ականներին նկարահանված Energizer Bunny մարտկոցների գովազդային հոլովակների շարքը: Առաջին հոլովակում մի խումբ ճագարներ հարվածում էին փոքրիկ թմբուկների վրա: Եվ մի որոշ ժամանակ անց նրանցից միայն Energizer մարտկոցով ճագարն էր շարունակում թմբկահարել: Մի քանի տարի անց նկարահանվեց նաև երկրորդ հոլովակը, որը առաջինի շարունակությունն էր, միայն էկրանին հայտնվում էր «թմբկահարում է և թմբկահարում է» արտահայտությունը: Մի քանի տարի անց գովազդը լրացվեց «դեռ թմբկահարում է» տարբերակով: Այս քաղաքականությունը ֆիրման պաշտպանեց մոտ տասնհինգ տարի:

Գովազդի մասին մեկ այլ հոդված կարող եք կարդալ այստեղ:

Advertisements